रुपन्देही, श्रावण ३१ । कक्षा १२ को Grade Improvement (Supplementary) Exam आगामी असोज ६ र ७ गते हुने भएको छ । उक्त परीक्षा नट ग्रेडेड (Not Graded) नतिजा ल्याएका विद्यार्थीका लागि सञ्चालन हुन लागेको हो । विगतका वर्षमा दुई वटासम्म विषयमा एनजी आउँदा ती विषयमा मात्रै ग्रेडवृद्धि परीक्षा त्यही वर्ष दिन पाउने र दुईभन्दा बढी विषयमा एनजी आएमा अर्को वर्ष सबै विषयको परीक्षा दिनुपर्ने व्यवस्था थियो ।

यस वर्षदेखि उक्त व्यवस्था परिमार्जन गरी जति वटा विषयमा एनजी आएको हो त्यसको मात्र परीक्षा दिन पाउने व्यवस्था गरिएको छ । यस वर्षको नतिजाअनुसार १ लाख २३ हजार तीन सय ९६ जनाले Grade Improvement (Supplementary) Exam मा सहभागी हुँदै छन् । जसमध्ये एक विषयमा मात्र एनजी आउने विद्यार्थीहरुको संख्या  ७९ हजार पाँच सय ८४ रहेको छ । राष्ट्रिय परीक्षा बोर्डले नतिजामा चित्त नबुझेमा १५ दिनभित्र प्रतिविषय पाँच सय रुपैयाँ तिरेर पुनर्योग गराउन सक्ने व्यवस्था गरेको छ। त्यसमा पनि चित्त नबुझे विद्यार्थीले उत्तरपुस्तिका हेर्न र पुनः परीक्षण गराउन सक्ने पनि व्यवस्था  छ ।

लेटर ग्रेडिङ निर्देशिकाअनुसार कुनै विषयमा ३५ प्रतिशतभन्दा कम अङ्क ल्याएमा नट ग्रेडेड (एनजी) हुन्छन् । एनजी आएकाहरुले ग्रेडवृद्धि परीक्षामा सहभागी नभई उच्च शिक्षा अर्थात् माथिल्लो कक्षा अध्ययन गर्न पाउने छैनन् ।

विद्यार्थीले उत्तरपुस्तिका पुनः परीक्षण गराउँदा नयाँ तीनजना परीक्षकबाट जाँच गराउने व्यवस्था गरेको छ । राष्ट्रिय परीक्षा बोर्ड सानोठिमीले मङ्गलबार सार्वजनिक गरेको कक्षा १२ को नतिजाअनुसार ४९.०९ प्रतिशत विद्यार्थी अनुत्तीर्ण भएका छन् । विद्यार्थी सबैभन्दा बढी अङ्ग्रेजीमा कमजोर रहेको तथ्याङ्कले देखाएको छ ।