सम्बन्धका हिसाब-किताब, एक ऋण (कविता)

ऋण भनेको पैसाको मात्र नसम्झनु होस्
कसैको गुनको ऋण हुन्छ

कसैको बैगुन्यको ऋण हुन्छ।
हजारौँ मान्छेको बचनको ऋण हुन्छ
लाखौँको कसमको ऋण पनि हुन्छ
र ऋणहरू ब्याजसहित तिरिन्छन्,

हामीले बोलेका शब्दहरू, नबोलेका वाचा,
भेट नभएका अनुहारहरू,
अधुरा रहेका स्पर्शहरू —
सबैको आफ्नै प्रकारको ऋण हुन्छ।

तिमीले बोलेका शब्दहरू, लगाएका झूटा आरोपहरू
कपोकल्पित मान–सम्मानमा आँच आउने बाणहरू
नदेखिने गरी खनेका खाडलहरू
नसुन्ने गरी बोलेका भेदहरू —
सबैको आफ्नै प्रकारको ऋण हुन्छ।

यी ऋणहरू
न बैंकमा लेखिन्छन्, न त कागजमा साँचिन्छन्,
तर आत्मामा गहिरो खाल्टो पारेर बस्छन्।

र समय आउँछ —
जुन दिन ब्याजसहित तिर्नुपर्ने हुन्छ,
कसैले पश्चात्तापमा, कसैले सम्झनामा,
कसैले आँसुसँग, अनि कसैले मौनतामा…

त्यसैले कहिल्यै नबिर्सिऊ —
ऋण भनेको केवल पैसा होइन,
कहिलेकाहीँ त आत्मा नै गिरवी रहन्छ…!!