लोकसारथि संवाददाता, काठमाडौं ।

निषेधित क्षेत्र तोडेर आन्दोलन गरेको आरोपमा पक्राउ परेका राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनसहितका नेताहरूलाई प्रहरीले रिहा गरेको छ ।

आइतबार सिंहदरबार परिसरमा विरोध प्रदर्शनको तयारी गर्दै गर्दा लिङ्देनसहितका सात जना नेताहरूलाई प्रहरीले नियन्त्रणमा लिएको थियो । पक्राउ परेकामध्ये राप्रपाका वरिष्ठ नेता ज्ञानबहादुर शाही, बुद्धिमान तामाङ, युवा मोर्चाका अध्यक्ष कैलाश कटवाललगायत थिए ।

उनीहरूलाई तीन घन्टासम्म जिल्ला प्रहरी परिसर, भद्रकालीमा राखेर रिहा गरिएको प्रहरीले जनाएको छ ।

राप्रपाले आइतबार आयोजना गरेको प्रदर्शन शान्तिपूर्ण भएको प्रहरीले बताएको छ । यद्यपि, बिजुलीबजार क्षेत्रमा निषेधित क्षेत्र तोड्ने प्रयास भएको र सो प्रयासलाई प्रहरीको सतर्कताले असफल बनाइएको जनाएको छ ।

राप्रपाले आफ्ना मागहरूका लागि निरन्तर दबाबमूलक कार्यक्रम गर्दै आएको छ । पार्टीले सरकारले जनताको आवाज नसुनेसम्म आन्दोलन जारी राख्ने जनाएको छ ।