लोकसारथि संवाददाता, काठमाडौं ।

नेपालको निर्यात क्षेत्रले उत्साहजनक प्रगति देखाएको छ। चालु आर्थिक वर्ष २०८२/८३ को पहिलो तीन महिनाको अवधिमा नेपालले उल्लेखनीय मात्रामा वस्तु निर्यात गरेको भन्सार विभागले जनाएको छ। विभागका अनुसार असोज महिनामा मात्रै नेपालले २५ अर्ब ४६ करोड रुपियाँ बराबरका वस्तु निर्यात गरेको छ।

पछिल्ला वर्षहरूमा नेपालको अन्तर्राष्ट्रिय व्यापारमा निर्यातको हिस्सा सधैं न्यून रहँदै आएको भए पनि यो वर्ष निर्यातमा करिब ९० प्रतिशत वृद्धि भएको तथ्याङ्कले देखाउँछ।

तीन महिनामा ७२ अर्बको निर्यात

भन्सार विभागका अनुसार चालु आर्थिक वर्षको पहिलो तीन महिनासम्म नेपालले ७२ अर्ब ७८ करोड रुपियाँ बराबरका वस्तुहरू निर्यात गरेको छ।
गत वर्ष सोही अवधिमा निर्यात ३८ अर्ब ३७ करोड रुपियाँ मात्र थियो।

निर्यात वृद्धि भएसँगै नेपालको अन्तर्राष्ट्रिय व्यापारमा निर्यातको हिस्सा १३.४६ प्रतिशत पुगेको छ, जुन गत वर्षको ८.९४ प्रतिशत भन्दा उल्लेखनीय वृद्धि हो।

भटमास तेल प्रमुख निर्यात वस्तु

निर्यात वृद्धि भटमास तेलका कारण भएको देखिन्छ। तीन महिनामा मात्रै नेपालले ३० अर्ब ६९ करोड रुपियाँको भटमास तेल भारतमा निर्यात गरेको छ।
त्यसपछि दुई अर्ब ५७ करोडको गलैंचा, दुई अर्ब १३ करोडको सूर्यमुखी तेल, एक अर्ब ७३ करोडका फेल्टका सामग्री, र एक अर्ब ६७ करोडको अलैंची निर्यात भएको विभागले जनाएको छ।

चाडपर्वले बढायो आयात

दसैं–तिहारका चाडबाडले भने आयातमा तीव्र वृद्धि गराएको छ। असोज महिनामा मात्रै नेपालले एक खर्ब ६२ अर्ब ९२ करोड रुपियाँको वस्तु आयात गरेको छ, जुन गत वर्षको सोही अवधिको एक खर्ब २८ अर्ब २० करोड भन्दा धेरै हो।

तीन महिनाको समग्र अवधिमा आयात तीन खर्ब पाँच अर्ब रुपियाँ पुगेको छ, जसमा करिब २० प्रतिशत वृद्धि देखिएको छ। गत वर्ष सोही अवधिमा आयात दुई खर्ब ६२ अर्ब ५४ करोड मात्र थियो।

कच्चा भटमास तेल नै प्रमुख आयात

रोचक पक्ष के छ भने निर्यातमा अग्रणी रहेको भटमास तेल आयात सूचीको शीर्षमा पनि छ।
नेपालले तीन महिनामा ३० अर्ब २४ करोड रुपियाँको कच्चा भटमास तेल आयात गरेको छ।
त्यसपछि २० अर्ब ६९ करोडको डिजेल, १७ अर्ब ११ करोडको रासायनिक मल, १६ अर्ब ७६ करोडको पेट्रोल, १३ अर्ब ६२ करोडको एलपी ग्यास, र १२ अर्ब ५१ करोडको स्मार्टफोन आयात भएको तथ्याङ्कमा उल्लेख छ।

निर्यातको वृद्धिले नेपालका व्यापारिक संकेतकमा सकारात्मक सन्देश दिएको भए पनि आयात वृद्धि अझै उच्च रहनेक्रममा छ। आर्थिक विश्लेषकहरूका अनुसार, निर्यातमुखी उत्पादनमा दीर्घकालीन लगानी र कच्चा पदार्थमा निर्भरता घटाउन नसकेसम्म नेपालको व्यापार घाटा सन्तुलनमा ल्याउन कठिन हुने देखिन्छ।