लोक सारथी संवाददाता

मंसिर ८–९ गते दुई दिने राष्ट्रिय युवा संघ नेपालको केन्द्रीय कमिटीको दोस्रो पूर्ण बैठकमा नेकपा (एमाले) पार्टी अध्यक्ष केपी शर्मा ओली राजावादीहरुलाई कटाक्ष गर्दै बोलेका थिए । उक्त बैठक नेकापा(एमाले) केन्द्रिय कार्यालय, ललितपुरमा सम्पन्न भएको थियो । राजा र राजतन्त्रको कुनै औचित्व नरहेको बताउँदै ओली भन्छन्–

‘‘१७ वर्ष अगाडि फालिसकेको, हेर्दा, हेर्दा, हेर्दा वाक्क, प्याक्क, दिक्क भएर जनताले पाल्न नसकिने रहेकछ यो, र यो काम लाग्ने चिजै होइन रहेछ , राजनैतिक रुपले, वैचारिक रुपले, सैद्धान्तिक रुपले, कुनै हिसाबले पनि ।’’

थप्दै उनले अगाडि भन्छन् – ‘‘एउटा मान्छे जन्मिदै राष्ट्रका प्रमुख भएर जन्मिने अरुका छोराछोरीले मरिमेटेर काम गरे पनि हुन नपाउने, यस्तो अन्यायपूर्ण विचार बोक्नेहरु । मैले एक पल्ट भनेँ चेतना नभएका मुर्खहरुले राजतन्त्र माग्छन् । एउटा मान्छेको छोरो जन्मिदै राष्ट्रप्रमुख भएर जन्मिने, लाटो जन्मिन्छ कि, गजेडी जन्मिन्छ कि, ड्रगिस्ट भएर जन्मिन्छ कि, कस्तो भएर जन्मिन्छ, लफङ्गसफङ्ग भएर जन्मिन्छ कि, थाहा छैन, जन्मिदै राजा हुने । नागरिक सर्वाेच्चता स्वीकार नगर्ने । देशभरीका जनतामा सार्वभौमसत्ता भनेर मान्न नसक्ने, एउटा व्यक्तिमा सार्वभौमसत्ता हुनुपर्छ भन्ने, त्यो चेतना, चेतना हो र ? मुर्खता हो ।’’

राजा छँदाको नेपाललाई अन्य देशहरुसँग तुलना गर्दै पार्टी अध्यक्ष ओलीले थप्छन् – ‘‘कतिपय देशले ऐतिहासिक कारणले सम्झौता गरेका होलान, राजनीतिक सम्झौता गरेका होलान्, कतिपय देशले गरेका होलान, हुनसक्छ त्यो । अरु देशको मामिलामा हामी बोली रहेका छैनौं । अरु देशमा प्रणालीहरुलाई, अरु देशमा जनता र शासकबीचका सम्झौताहरुलाई हामीले केही भन्नु छैन । हामीले सिद्धान्तको मात्रै कुरा गरेका, हाम्रो देशमा सिद्धान्तको मात्र होइन व्यवहारको कुरा गरेका हाम्रो देशमा राजतन्त्र काम लाग्दैन भनेर नेपाली जनताले फालेका हुन् । यो देशमा २० सालभन्दा अगाडिसम्म एउटा बाटो नबन्नुको कारण के ? अनि विकास हुनै नसक्नुको कारण के ? २४० वर्ष राजतन्त्रले खायो । अन्त शिक्षामा अगाडि, स्वास्थ्यमा अगाडि, विकासमा अगाडि, पूर्वाधारमा अगाडि, सबै हुँदाखेरी पनि हाम्रो देशमा किन हुन्न ?’’

‘‘जङ्गबहादुरको शासन आयो १९०३ मा कोतपर्वबाट । त्यसको ७ वर्षपछि दरबार स्कूल पहिलो पल्ट खुल्यो । त्योभन्दा अगाडि राजाहरुले किन खोलेनन् ? नीति के थियो ? जनता पढाउने नीति थियो ? लोकतान्त्रिक नीति थियो? राजाहरुले जनता पढाउनुपर्छ भन्थे ? होइन अन्धकारमा राख्नपर्छ भन्थे । कानून थिएन । म जे भन्छु त्यही कानून हो भन्थ्यो अनि राजतन्त्रले के केनै गर्याे भनेर काँ हुन्छ ?’’ कोतपर्व र तत्कालीन राज्य–नीति उल्लेख गर्दै उनले भने ।