बारा, नेपाल: विश्व प्रसिद्ध गढीमाई मन्दिरमा शुक्रबार स्थानीय समूहबीच भएको विवादले धार्मिक तथा सामाजिक तनाव निम्त्याएको छ। महागढीमाई नगरपालिकाका नगरप्रमुख उपेन्द्र प्रसाद यादवले केही व्यक्तिहरूले मन्दिर परिसरमा द्वन्द सृजना गर्न प्रयास गरेको आरोप लगाएका छन्।

नगरप्रमुख यादवका अनुसार पञ्चवर्षीय गढीमाई मेलामा भक्तजनहरूले भाकल पूरा गरेपछि चढाएको परेवाको चोरी रोक्ने प्रयासमा विवाद चुलिएको हो। बिहीबार राति परेवा लुट्ने प्रयास भएको र नगरप्रहरीले रोक्न खोज्दा स्थानीय केही बालबालिका सामान्य घाइते भएको नगरप्रमुखले बताएका छन्।

स्थानीयको तोडफोडको आरोप

नगरप्रमुख यादवले महागढीमाई नगरपालिका वडा नं. १ का वडाध्यक्ष मनोज गुप्ता, संविधानसभा सदस्य शिवचन्द्र कुश्वाहा, मोतीलाल कुश्वाहा र सत्यनारायण कुश्वाहालाई गढीमाई मन्दिरमा तोडफोड गराउन युवाहरूलाई परिचालन गरेको आरोप लगाएका छन्। उनले यो कार्यलाई राजनीतिक पूर्वाग्रह राखेर गरिएको भनेका छन्।

“मन्दिरको विकास गर्न खोज्दा समाजिक द्वन्द सिर्जना गर्न खोजिएको छ,” यादवले भने। धार्मिक तनाव चर्काउने प्रयास विफल भएको र दोषीलाई कडा कानुनी कारबाही गरिने उनले बताए।

परेवाको संरक्षण र आम्दानी

नगरप्रमुखका अनुसार यस वर्ष परेवाको संरक्षण गर्न ‘खोप’ (परेवा बस्ने घर) बनाई व्यवस्थित गरिएको छ। परेवाबाट हुने आम्दानी गढीमाई ट्रस्टलाई जाने हुँदा मन्दिरको आर्थिक गतिविधि सुदृढ भएको छ।

पसल व्यवस्थापन विवाद

गढीमाई मन्दिरलाई विश्व सम्पदा सूचीमा समावेश गर्ने लक्ष्यसहित मन्दिर परिसरका अव्यवस्थित पसलहरू हटाउन खोज्दा विवाद थप चर्किएको यादवले बताए। “जबरजस्ती पसल राख्नेहरूले समस्या सिर्जना गरिरहेका छन्,” उनले भने।

प्रहरी र स्थानीय घाइते

घटनामा राजदीप पाण्डे, रामनरेश यादव, निलम गुप्ता, रामविनेश कुशवाहा लगायत नगरप्रहरी घाइते भएका छन्। प्रहरी नायव उपरीक्षक प्रकाश सापकोटाका अनुसार घाइतेहरूको उपचार प्रादेशिक अस्पताल कलैया र गम्भीर घाइतेहरूको थप उपचार वीरगञ्जमा गरिएको छ।

अनुसन्धान जारी

घटनाको अनुसन्धान भइरहेको र दोषीलाई कानुनी दायरामा ल्याइने प्रहरी नायव उपरीक्षक सापकोटाले जानकारी दिएका छन्।