काठमाडौं, फागुन २५ – पूर्वराष्ट्रपति विद्यादेवी भण्डारीले हालको स्थिर सरकारले मुलुकका विभिन्न क्षेत्रमा देखिएका समस्याहरू समाधान गर्ने विश्वास व्यक्त गरेकी छन्। शुक्रबार काठमाडौंमा आयोजित एक कार्यक्रममा श्री अरुणोदय माध्यमिक विद्यालय, भोजपुरको स्मारिका लोकार्पण गर्दै उनले विगतमा ६–६ महिनामा सरकार परिवर्तन हुने अवस्थाको अन्त्य भई अहिले स्थिर सरकार बनेको उल्लेख गरिन्।

उनका अनुसार, ठूला दलहरूबीचको सहकार्यबाट बनेको वर्तमान सरकारले आर्थिक लगायत अन्य क्षेत्रका समस्याहरू समाधान गर्न सक्षम हुने आशा गरिएको छ। तथापि, भण्डारीले यदि यस सरकारले पनि केही गर्न सकेन भने जनतामा थप निराशा र चासो बढ्ने चेतावनी दिइन्।

शिक्षाको महत्वमा जोड दिँदै भण्डारीले अध्यापनका लागि विद्यार्थी र शिक्षकहरूलाई विदेश जानुपर्ने अवस्थाको अन्त्य गर्नुपर्ने धारणा राखिन्। उनले शिक्षा क्षेत्रलाई समयानुकूल सुधार गर्दै राष्ट्र निर्माणमा मुख्य खम्बाको रूपमा विकास गर्नुपर्ने आवश्यकता औंल्याइन्।

पूर्वराष्ट्रपतिले युवाहरूलाई स्वदेशमै रोक्न र उत्पादनमूलक क्षेत्रमा सक्रिय गराउनुपर्ने आवश्यकता पनि बताइन्। कार्यक्रममा विभिन्न क्षेत्रका व्यक्तिहरूलाई सम्मान गरिएको थियो।