लोकसारथि, ३ फाल्गुन । सुदूरपश्चिम प्रदेशका चार संसदीय समितिमा सभापतिहरू निर्विरोध निर्वाचित भएका छन्। प्रदेशसभा सचिवालयका अनुसार, एक-एक जनाले मात्र उम्मेदवारी दिएको कारण निर्वाचन प्रक्रिया बिना नै उनीहरू चयन भएका हुन्। यद्यपि, यसको आधिकारिक घोषणा भने आइतबार गरिनेछ।

निर्विरोध निर्वाचित हुने सभापतिहरू निम्नानुसार छन्:

• सामाजिक विकास समिति – नेकपा एमालेका धर्मराज पाठक
• सार्वजनिक लेखा समिति – नेकपा माओवादी केन्द्रका अक्कल रावल
• अर्थ विकास तथा प्राकृतिक स्रोत समिति – नागरिक उन्मुक्ति पार्टीका घनश्याम चौधरी
• विशेषाधिकार समिति – नेपाली कांग्रेसकी तुलसी देवकोटा

प्रदेशसभा सचिवालयका सूचना अधिकारी युवराज जैशीका अनुसार, आइतबार बिहान १० देखि ११ बजेसम्म उम्मेदवारविरुद्ध दाबी विरोधको समय तोकिएको छ। त्यसपछि १२ बजे उम्मेदवारहरूको अन्तिम नामावली प्रकाशन गरिनेछ र १ बजे सम्बन्धित समितिहरूको बैठकमार्फत सभापतिको औपचारिक घोषणा गरिनेछ।

यसअघि, पुस ११ गते सत्तारुढ नेपाली कांग्रेस र नेकपा एमालेबीच संसदीय समितिहरूको नेतृत्व बाँडफाँट गर्ने सहमति भएको थियो। सोही सहमतिअनुसार,

• सामाजिक विकास समिति एमालेले,
• सार्वजनिक लेखा समिति माओवादी केन्द्रले,
• अर्थ विकास तथा प्राकृतिक स्रोत समिति नागरिक उन्मुक्ति पार्टीले,
• विशेषाधिकार समिति कांग्रेसले पाउने सहमति भएको थियो।

प्रदेशसभामा यसअघि नै सबै संसदीय समितिमा सभापति चयन भइसकेका थिए। तर, विधायन तथा प्रदेश मामिला समितिबाहेक अन्य तीन समितिका सभापतिहरू मन्त्री भएपछि ती समिति ज्येष्ठ सदस्यको भरमा सञ्चालन भइरहेको थियो। विधायन तथा प्रदेश मामिला समितिमा भने देवानसिंह विष्ट सभापति छन्।

यस निर्वाचनसँगै सुदूरपश्चिम प्रदेशका संसदीय समितिहरू पुनः पूर्णता पाएका छन्।