नेपाल सरकारले जाजरकोट भूकम्पमा परी मृत्यु भएकाका परिवारलाई प्रति मृतक दुई लाख रुपैयाँ राहत दिने निर्णय गरेको छ ।

सिंहदरबारमा आज बसेको मन्त्रिपरिषद् बैठकको निर्णयको जानकारी दिँदै नेपाल सरकारका प्रवक्ता एवं सञ्चार तथा सूचना प्रविधिमन्त्री रेखा शर्माले तत्काल राहतस्वरुप पहिलो चरणमा सहयोग गर्ने निर्णय भएको जानकारी दिइन् ।

त्यस्तै, मन्त्री शर्माले जाजरकोट भूकम्पका कारण ज्यान गुमाएकाप्रति श्रद्धाञ्जली व्यक्त गर्दै राहत तथा उद्धार कार्यलाई तीव्रता दिने र घाइतेको निःशुल्क उपचार गर्ने निर्णय गरिएको जानकारी दिए । जाजरकोटलाई केन्द्रविन्दु बनाएर शुक्रबार राति गएको ६.४ रेक्टर स्केलको भूकम्पमा जाजरकोट र रुकुम पश्चिम जिल्लामा एक सय ५७ जनाको मृत्यु भएको छ ।